Mehkma Shehri Difa ki shehriyon ko mohtat rehne ki hidayat, intibah jari hone ke chand minute baad hi wapas le liye gaye. Report
Mian Nadeem Hafta 24 October 2026 22:23

Makka Mukarrama, Jeddah aur Taif mein Houthi hamlon ka khatra, Saudi Civil Defense ka alert..

Saudi Arab ke mehkma shehri difa ne mulk ke maghbi hissay ke char ilaqon mein mumkinah khatray se mutaliq hangami intibah jari kiya, jin mein Makka Mukarrama, Jeddah, Taif aur sahli shehar Yanbu shamil hain, taham yeh intibah jari hone ke chand minute baad hi wapas le liye gaye.

Khabar rasan idaray AFP ke mutabiq, Saudi Shehri Difa ne mutalqah ilaqon ke rehaishiyon ko hidayat ki thi ke woh fouri tor par qareebi mehfooz maqam par muntaqil ho jayen. Makka Mukarrama Musalmanon ke liye muqaddas tareen shehar hai, jabke Jeddah Baheera-e-Ahmar (Red Sea) ke sahil par waqi ek ahem shehar hai. Mehkma shehri difa ne intibah wapas lene ke baad bhi shehriyon ko mohtat rehne ki hidayat dein.

Hukkam ne mizailon aur drones ko rokne ya un ke khilaf karwai se mutaliq tasaveer aur maloomat social media ya digar zaraye par share karne ke khilaf qanooni tanbeeh bhi dohrai. Report mein fouri intibah jari kiye jaane ki wajah, kisi mizail ya drone ki maujoodgi aur mumkinah nuqsan se mutaliq tafseelat faraham nahi ki gaein. Hukkam ki janib se alert wapas liye jaane ke baad in ilaqon mein kisi jani ya mali nuqsan ki ittela bhi report mein shamil nahi hai.
Riyadh (UrduPoint Akhbar Taza Tareen - International Press Agency. 24 October 2026)

#Saudi #CivilDefense